PARLAMENTU TIMOROAN APROVA ORSAMENTU ESTADU BA 2017 HO UNANIMIDADE

09 de Dezembro de 2016, 16:30

DILI - Parlamentu Nasionál timoroan iha ohin  aprova ho unanimidade, espesialidade no votasaun globál finál, Orsamentu Jerál Estadu (OGE) ba 2017 no Orsamentu dahuluk ba Seguransa Sosiál (OSS), hafoin iha semana hirak nia-laran hala’o debate.



Intervensaun ikus nian iha debate, primeiru-ministru, Rui Maria de Araújo, haktuir katak, maski mosu  ideia lahanesan, bele hetan konsensu polítiku ida di’ak ba futuru Timor-Leste nian. 

Apoiu ida, afirma nia  , katak sei hala’o aleinde kualkér interesse " ba ida ka grupu seluk" no oinsa presiza koloka  nesessidade  hodi kombate inefisiénsia, esbanjamentu no korrupsaun", ne’ebé sai hanesan risku  ba dezenvolvimentu nasionál.

Tuir  Rui Araújo, konsensu polítiku relasiona ba gastu  públiku sira dezde 2013  ne’e  essensiál tebes  atu harii nasaun, marka prosesu " partisipasaun konstrutivu"ida,  ne’ebé tuir  papel "arkitetu" Xanana Gusmão no Mari Alkatiri.

"Espasu  entre diverjénsia no diskussaun  maka iha permite ba ita atu  deside di’ak liu ba  povu no ba nasaun. Ita hein katak  ida ne’e  kontinua sai referénsia ida  ba Governu oin mai", nia haktuir.

"Maibé  konsensu polítiku ne’e  presiza responsabilidade boot ba órgaun soberania sira, laós deit ba sira ne’ebé  halo ezekusaun orsamentu no implementasaun programa sira, maibé nomós ema hirak ne’ebé  iha responsabilidade halo fiskalizasaun", nia konsidera.

Unanimidade ohin loron nian "reprezenta votu konfiansa ida"  ne’ebé Governu " hakarak fó  onra, no serbisu ho empeñu liu tan ba  povu no ba nasaun, no hatutan tan katak, agradese ho forma "demokrátika no konstrutivu"  hanesan  lala’ok iha debate orsamentál nian.

" Governu afirma ho kompromisu implementa  programa ne’e tuir ninia mandatu no kontinua empeñadu iha  evolusaun ba progressu ne’ebé alkansa ona, aposta iha konstrusaun infraestrutura transversál no plurianuál ne’ebé sei permite dinamiza ekonomia laós petrolífera no aumenta sustentabilidade iha nia projetu dezenvolvimentu",  nia hatete.

Rui Araújo senti haksolok ho konsensu ne’e hodi bele "konkretiza reforsau instituisaun justisa", permite "kontrata assisténsia téknika internasionál - majistradu, auditor no assessoria téknika balun tan -  ba Defensoria Publika, Ministériu Públiku no tribunál ".

Ho totál,  laiha kualkér alterasaun ba valór konta públika 2017 nian ne’ebé aprezenta hosi Governu, prevé gastu dólar millaun rihun 1,39, kiik liu kompara  dezde 2010, no reseita hamutuk millaun rihun 1,41. 

Orsamentu dahuluk ba Seguransa Sosiál (OSS) timoroan, hosi nia parte, prevé reseita dólar millaun 26,99  iha 2017,  ho kontribuisaun sira durante  tinan tomak  sa’e ba dólar millaun 22,75.

Aprovasaun ba OSS hahú permite, iha 01 fulan- janeiru 2017, Rejime Kontributivu Seguransa Sosial Timor-Leste nian badahuluk.

Iha preparasaun Orsamentu Estadu  ba 2017, Governu hatete katak tetu ona sustentabilidade fiskál no "kapasidade ka kualidade ezekusaun orsamental Estadu nian" no iha "esforsu ba dezenvolvimentu infraestrutura, konsolidasaun ba dezenvolvimentu iha rekursu umanu no kria kondisaun ba dezenvolvimentu ekonomia doméstiku laós-petrolíferu", nia afirma.

Testu orsamentál ne’ebé aprova agora sei tama ba aprovasaun hosi  Prezidente Repúblika ne’ebé, iha setembru, liuhosi diskursu iha Parlamentu husu atu Orsamentu Estadu ba 2017 "prudente no responsável", reflete inserteza hosi  rikeza petrolíferu Tasi Timor nian.

"Ha’u hein katak, bele kontráriu duké  prátika ne’ebé ita halo ona, preparasaun Orsamentu Jerál Estado ba tinan 2017 no tinan tuir mai  hetan alterasaun no bazea ba  realidade folin petróleu no rezerva Tasi Timor nian, ne’ebé laseguru", hatete Taur Matan Ruak.

"Ninia  preparasaun  tenki ho planeamentu ida didi’ak, prudente no responsável, tuir  realidade ohin loron nian no  futuru", informa, iha sesaun solene arranka sesaun lejislativu atuál lejislatura 5.ª.

Taur Matan Ruak, ne’ebé veta Orsamentu  2016, reafirma katak konta públika ba 2017 sei labele  rekorre levantamentu aas liu hosi Fundu Petrolíferu, nia hatutan, gasta ona liu dólar millaun rihun 7,3.

"Saida maka atu hala’o ho osan ne’ebé  gasta ladun barak. Ita kontinua moris iha ekonomia ida la-sustentável: nasaun  importa kuaze buat hotu ne’ebé konsume no esporta oituan liu. Desperdísiu iha  Administrasaun Públika signifika osan  gasta sein nesesidade", nia haktuir.

SAPO TL ho Lusa