MARIA VITORIA " MARVI " NIA KARREIRA IHA D'ACADEMY ASIA 2, GOVERNU OFERECE BOLSU ESTUDU



DILI-Governu Timor Leste ofisialmente halo ona kontaktu ba Embaixadór Timor-Leste iha Indonézia, hodi fó bolsa estudu ba kantora Maria Vitória ne’ebé hamorin ona Timor-Leste nia naran iha kompetisaun Dangdut  Akademi Asia 2 (D AA2).

“Governu disponivel atu esplora disponibilidade ne’ebé maka iha, depois Maria Vitória kanta, iha kalan ne’e kedan ha’u husu ba embaixada Timor-Leste iha Indonézia atu fó bolsa estudu ba nia atu estuda hamutuk ho Indosiár no sira seluk’, tanba talentu ida ne’ebé merese ita suporta”hatete PM Rui Maria de Araújo, ba Jornalista iha Palacio Governu, Tersa, (06/12).

PM Rui hatete, suporta ne’e, la’ós de’it ba Maria, maibé ba sira hotu, Maria mosu tanba nia tama iha prosesu kompetativu ida ho baze méritu no nia hatudu nia kapasidade atu dezenvolve ba oin, entaun governu buka atu suporta.

Rui mós hatutan, loos duni katak, iha Timor Leste seidauk iha sistema atu hala’o ne’ebé sai mós hanesan preukupasaun bo’ot ba governu TL.

Nune’e, PM Rui mós sente preukupa katak, depois konkursu refere remata, ba oin MarVi nia talenta atu halo nusa no bainhira Maria Vitória fila mai TL dezenvolve nafatin ka la’e.

Entaun haree ba preukupasaun ne’e maka Governu TL husu ba Embaixadór TL iha Jakarta Indonézia atu esplora posibilidade hirak ne’e hotu, depois  maka foin tetu posibilidade sira ne’e hotu hodi haree.

Maibé sei depende ba Maria Vitória ho nia família sira nia hakarak oinsá foin maka governu bele fó suporta, maibé haree ba desizaun privadu ba ema ida-idak ne’ebé ke atu foti.

“Governu agora sei la haree ba apoiu finanseiru, maibé oinsá maka governu haree ba oin ho talentu ne’ebé maka iha, bele hetan nafatin suporta hodi Maria Vitória bele dezenvolve nia a’an di’ak liu tan,”afirma PM Rui.

Entratantu iha loron Sesta kalan (06/12) iha kompetisaun ba top 12, Maria Vitória sei ho valór bo’ot no avansa ba top 9 tuir mai.

Purtantu hafoin aprezenta kanta Maria Vitória ne’ebé mak hetan husu hosi komentator Soimah katak oinsá atu hahú nafatin nia karreira iha Indonézia Jakarta.

Artista Maria Vitória ne’ebé mak ohin loron ema hotu koñese, iha momentu ne’eba dadalia ho nia mãe hosi skipe ne’ebé mak fó sai iha INDOSIAR rasik katak, seidauk bele foti desizaun.

“Mãe, hakarak ka lae? Tanba Ma’e (Soimah) hakarak ha’u hela nafatin iha Jakarta hodi esplora ka aumenta ha’u nia talenta,” Maria Vitória husu.

Ho nune’e Maria Vitória nia mama, responde katak nia seidauk bele foti desizaun hosi dadalia hosi Skipe maibé sei foti desizaun, bainhira pai ho mãe ho MarVi rasik tur hamutuk ho família hotu atu ko’alia.

“MarVi ha’u seidauk bele foti desizaun, maibé presiza tur hamutuk pai ho mãe no família sira tur hamutuk mak deside, maibé ha’u kontente no orgullu ba karreira no talenta ne’ebé mak MarVi hatudu,” MarVi nia mae dehan.

Hanoin ne’e mosu, kedas resposta bainhira hosi Primeiru Ministru Rui Maria de Araújo manda mensazen (SMS) diretamente ba iha komentator hosi Timor Leste, Anito Matos ‘Memi’ katak governu prontu fío bolsu estudu ba Maria Vitória hodi kontinua eskola iha Indonézia.

Alende kona-ba prosesu kompetisaun ohin loron, kompetisaun maka’as liu tan hodi tama ba top-6, tanba iha Top-9, mesak ema professional no maka’as kanta.

Maske nune’e Maria Vitória iha nafatin konfiansa ba nia-an ho talenta natureza ne’ebé mak  nia iha hafoin iha lisaun importante ne’ebé mak komentator sira sujere hodi hadi’a kada loron.

Iha mudansa signifikativu, Maria Vitória nia karreira iha mundu múzika liu-liu iha Dangdut nian, ne’ebé mak sempre koñesidu ho Mutiara dari Timor Leste ho liafuan ne’e sai hanesan motivasaun ekstraordináriu ba Maria Vitória atu avansa nafatin.

Hanesan múzika ne’ebé mak Maria Vitoria kanta iha loron desizaun nian iha segunda foin lalais halo komentatór sira sente impresionadu ho Maria Vitória nia aprezentasaun ne’ebé mak furak tebes halo komentatór hosi Malázia Masidayu ne’ebé mak sempre krítika Maria Vitória nia performa maibé ikus mai rekoñese katak Maria Vitória iha talenta di’ak ne’ebé avansa maka’as no di’ak tebes.

Hosi múzika no ekspresaun ne’ebé mak Maria Vitória hatudu, halo komentatór no haree na’in sira ne’ebé mak direta no indereta hasai nia matawen, bassa Maria Vitória ne’ebé mak hosi família simples maibé konsege lori no hamorin nasaun Timor Leste nia naran iha Ázia no mundu internasionál.

Alende ne’e, iha mudansa ne’ebé mak Maria Vitória sente la’ós deit hosi karreira no kanta maibé ho saúde ne’ebé mak di’ak ohin loron nia aumenta saúde di’ak ho apoiu hosi komentatór Ivan Gunawan ‘Igun’ ne’ebé mak fó susuben ba Maria Vitória ohin loron nia bele aumenta nia todan hosi kilo 30 ba besik to’o iha kilo 35.

Orgullu no apresiasaun hosi Timor Leste no Timoroan sira ne’ebé mak hela iha kontinente mundu tomak apresia no suporta nafatin Maria Vitória atu avansa nafatin to’o faze finál.

Maske sente kolen la’o serviu maka’as maibé sempre iha nafatin tempu no iha korajen hodi akompanha MarVi nia aprezentasaun, ida ne’e mak ita nia sekretáriu Estadu Juventude no Desportu (SEJD) ne’ebé mak la’o servisu iha fronteira maibé tesik iha dalan tenke tun hodi akompanha Maria Vitória iha komunidade nia uma.

“#MARVI 100% perfomances fantástiku, ami fila husi Fronteira asiste iha komunidade nia Televizaun iha Loes (Maliana), Parabens” Sekretáriu estadu hato’o liu hosi nia facebook.

Ivan Gunawan hato’o katak, nia apoiu ho Soimah nia hanoin ne’ebé mak husu Maria Atu kontinua eskola iha Indonézia hodi eksplora nia talentu.

“Sente triste no orgullu ho Maria Vitória nia talenta ne’ebé mak ekstraordinariu tebes, triste mós haree background Maria Vitória nia família, nia badinas no iha progresu di’ak tebes, tanba nia sempre aprende ho lais no sériu duni hakarak sai artista,” Ivan Gunawan hato’o.

Maibé Maria Vitória mós hatudu nia ema família baibain nia oan nune’e tein mós kanku iha estudiu lima Indosiar nune’e kontestante sira han no sente ho saida mak Maria Vitória tein.(gus/uly)

Fontes : 

   Copyright © 2016. diariutimorpost.tl. Developed by Timorwebmaster

About US | Contact Redaksi | RSS Feeds

Online: 26 / 501 Hits: 2090 / 3865031