EMÍLIA PIRES NEGA TIMOR

Dili - Eis Ministra Financas Timor-Leste, Emilia Pires haruka karta ba Tribunal no Ministeriu Publiku hodi nega katak nia laos sidadaun Timor.Tamba ne’e nia husu atu tranfere ninia kazu ba iha Portugal. Arguida Emilia Pires ofisialmente haruka karta ba Ministeriu Publiku ni Tribunal atu halo transferensia kazu ba iha Portugal tamba konsidera administrasaun Tribunal “sabraut” no arguida mos laos sidadaun Timor, maibe ema portugal. “pedidu seluk maka arguida (Emilia Pires) kestiona nia sidadaun portugal, entaun husu atu julgamentu tenki halo iha Portugal”, deklara juis prosesu, Jose Maria de Araujo liu husi audensia julgamentu, iha Tribunal Distrital Dili (TDD) horseik. Ne’e duni, pedidu Emilia Pires husu atu depois primeiru desizaun iha TDD sei halo rekursu no julgamentu foun iha Tribunal Portugal. Juis Joese hateten, pedidu arguida nu’udar tentativa atu hatun orgaun Soberania iha rai ne’e no kestiona Tribunal Rekursu Timor-Leste nian. Maske pedidu ne’e Tribunal simu ona, maibe Tribunal deside hodi defere (la simu) pedidu husi arguida Emilia Pires nian tamba lei la permite. Entretantu, Ministeriu Publiku liu husi prokuradora Angelina Saldanha dehan, pedidu arguida Emilia Pires nian la fundamental no la prinese rekezitu, tamba arguida antes ne’e iha Timor-Leste asuni kargu nu’udar Ministra Financas. Ne’e hatudu katak arguida sidadaun Timor-Leste no laos sidadaun Portugal. “Arguida hato’o nia pedidu mai iha Ministeriu Publiku (MP) ne ho razaun katak nia sidadaun portugal, laos sidadaun Timor-Leste. Tamba ne’e, maka husi parte MP la aseita ho pedidu arguida Emilia Pires ninian”, tenik nia.

      Konaba administrasaun judisiariu iha Timor lao ladi, Angelina dehan, Tribunal laos foin julgamentu ba kazu arguida Emilia Pires maibe krime partisipasaun Ekonomia mos julga barak ona, ne’ebe barak mak tama ona prizaun.

Nune’e, krime ne’ebe akontese iha teritoriu judisiariu rai ne’e Timor-Leste mos seidauk iha akordu ruma ho Portugal konaba atu transfere julgamentu husi Timor-Leste ba Portugal no husi Portugal mai Timor-Leste.

Informasaun kompletu bele iha Jornal Independente edisaun ohin loron 1/12/2016

Fontes : Jornal Independen